<新聞 頭條娛樂>
視后大熱 女神轉Look 索腿李佳芯 變暴力「10巴師奶」

近兩年成功攀上新紮花旦之位嘅李佳芯(Ali)獲公司力捧,除咗憑《踩過界》首次奪得「星和視后」外,早前亦憑《BB來了》中嘅貼地新手媽媽「唐恬兒」一角,人氣勁升,成為今年視后大熱門!近日,Ali再度挑戰演技,在新劇《殺手》飾演一名育有11歲兒子兼有歷練嘅師奶。監製陳維冠仲要求女神轉Look,爆炸頭配粗框眼鏡,繼續靠演技收賣「人心」。日前下午,Ali和前輩陳嘉輝等在北角拍外景,晒長腿嘅Ali要企街瘋狂掌摑前夫陳嘉輝10巴。怒火Ali演技大爆發,仲勁過當年「14巴港女」呀!
日前下午,Ali、陳嘉輝和韓瑪莉在北角建華街一個私人屋苑門外拍新劇《殺手》。劇情講述前夫陳嘉輝「潛水」10年後,冒雨在住所樓下向李佳芯認錯要求見阿仔,李佳芯不甘母子被拋棄多年,狠狠地掌摑對方10巴,忍淚咆哮道:「1年還1巴!」雖然有借位,但連續摑到「前夫」啪啪聲,加上唔同角度,55歲嘅老戲骨陳嘉輝都硬食咗幾十巴O架。

陳豪教Ali打人

原來現實生活中的,Ali從未試過打人,之前在《誇世代》曾摑過陳豪一巴,令佢好大壓力,Ali說:「每次拍呢啲戲我寧可被打,打人好大壓力。陳豪有教我好多執生技巧,比如點樣打人唔痛又有效果。拍前我哋有度位,手要放鬆,加埋角度遷就,但巴巴都中面係會掂到,咁樣先至夠逼真,同時唔會傷到對手。哈!開機後我唔會手軟。」問到陳炳銓(Danny)會否怕咗呢個惡死女友?她笑說:「又唔會驚喎!拍呢場戲我係有壓力,所以拍前有同佢(Danny)提過,佢反而會從劇情出發話:『咁要狠啲喇。』」另外,對於劇組拍攝當日疑惹怒樓上居民被掟雞蛋,Ali並不知情,謂最緊要係大家相安無事,外景順利完成。
#殺手 #李佳芯



Source

LEAVE A REPLY

Please enter your comment!
Please enter your name here