*嚴禁劇透* *粗口自行過濾* *可瘋狂話戲屎但免人身攻擊* [1230隔夜超短劇評][TVB][跳躍生命線 EP08] [讚] 明叔明嬸鋪咗咁多集,都估到佢哋一定有事,但真係估唔到係明嬸出事而唔係明叔,仲要冇埋條命。呢次畀佢呃咗,但畀佢呃得幾甘心,因為明叔叫幾位阿sir等埋佢,等佢可以送老婆最後一程嗰吓真係好感動。我好鍾意喺升降機裡面嗰個top shot,成個環境好冰冷、好迫,令到五個人好貼近,但係咁近都救唔到明嬸,真係好無力。呢幕預咗陳榮峻表演,但估唔到何廣沛孭住佢嗰吓啲情緒都做得幾好,馬神嗰個好激動又要冷靜嘅表情又畀到。

明叔明嬸呢個case,表現到啲救護硬道理,就係要冷靜處理問題,唔好令問題變大變複雜。亦都表現到啲軟事件,就係傑仔嘅心情。最初佢同雄姐未出發喺休息室嗰時,傑仔仲話雄姐救一個人儲一蚊係心地唔好,但後來佢遇嚟遇去都係啲細case同埋濫用case時,佢就開始失咗方向,變咗想遇到啲「真case」。到最後佢遇到嘅居然係明嬸,仲要係救唔到佢,真係舖排得好。另外,明叔去到醫院已經冇呼天搶地,仲好似好冷靜,呢個寫法我鍾意。其實明叔已經睇生死睇得好輕,因為佢以為自己會走先,亦都寫到出面佢成日同老婆做心理準備。喺呢個醫院位編劇其實都可以寫到明叔崩潰,賺盡你啲眼淚,但又冇,畀返個位觀眾唞吓氣,再連埋傑仔最後食嗰粒明嬸畀佢嘅嘉應子,呢個都幾好,畀返啲希望嚟。如果唔係呢幾集累積落嚟我覺得會太過矯情催淚。

同在哥傑仔一組嘅大隻,陳偉洪又演得幾好喎,喺在哥同埋傑仔兩個極端之間做返個平衡,睇落去舒服。 [彈] 天台surprise嗰幕啲燈落咗星星鏡,我真係接受唔到呀……另外,暉仔、Luna咁樣連埋一齊又冇乜事件發生好似浪費咗啲,班女人整甜品亦都只係講多次祈祈嘅男朋友,有啲無謂,希望之後劇情係有關。

係咪我感覺錯咗呢?我覺得張曦雯冇馬神呢幾幕立即變返好勁嘅女人味,唔同車房時咁有少少硬淨感覺。 [wooo] 有李靖筠呀!!! [演員表] 馬德鐘 飾 麥在田 / 何廣沛 飾 卓家傑 / 郭子豪 飾 陸昊然/ 張彥博 飾 呂劍雄 / 張曦雯 飾 文暉 / 劉佩玥 飾 章可祈 / 陳瀅 飾 向滿月 / 羅天宇 飾 譚家俊 / 韋家雄 飾 高行仁 / 張文慈 飾 麥愛花 / 李成昌 飾 卓裘 / 歐瑞偉 飾 王海 / 鄭子誠 飾 刑峰 / 陳偲穎 飾 麥諾兒 / 李佳芯 飾 章蕙芯 / 李霖恩 飾 常朗天 / 陳偉洪 飾 余國榮 / 李日昇 飾 張啟冠 / 崔建邦 飾 羅應佳 / 張國強 飾 魯永健 / 楊卓娜 飾 游子嵐 / 羅蘭 飾 李英愛 / 陳榮峻 飾 明叔 / 吳香倫 飾 明嬸 / 翟威廉 飾 康 / 謝芷倫 飾 藍欣 / 李靖筠 飾 況晴
#1230隔夜超短劇評 #無綫 #TVB #跳躍生命線 #馬德鐘 #何廣沛 #郭子豪 #張彥博 #張曦雯 #劉佩玥 #陳瀅 #韋家雄 #張文慈 #李成昌 #歐瑞偉 #鄭子誠 #陳偲穎 #李佳芯 #李霖恩 #陳偉洪 #李日昇 #崔建邦 #張國強 #羅蘭 #陳榮峻 #吳香倫 #翟威廉 #謝芷倫 #李靖筠



Source

LEAVE A REPLY

Please enter your comment!
Please enter your name here